ALLES IS NIE ALTYD 'N PERSOONLIKE AANVAL NIE

Toe die Israeliete vir Samuel vra om vir hulle 'n koning aan te stel, was Samuel diep teleurgesteld. Hy het gevoel asof die volk sy leiding en oordeel verwerp. As profeet en regter het hy met opregtheid vir hulle opgetree en hulle geestelik en polities gelei. Samuel se hartseer kom uit 'n plek van lojaliteit aan God en 'n begeerte dat die volk op God sal vertrou as hul enigste Koning.

Maar God troos vir Samuel en verseker hom dat dit nie hom is wat hulle verwerp het nie, maar vir God self. Hierdie verwerping is nie 'n persoonlike aanval teen Samuel nie, maar deel van 'n patroon waarin Israel keer op keer van God afvallig raak. God sê vir Samuel om aan die volk se versoek gehoor te gee, maar ook om hulle te waarsku teen die gevolge van ’n aardse koning – hoe so iemand hulle sal uitbuit en oor hulle sal heers.

Samuel se teleurstelling wys sy toewyding aan God se plan en sy diepe hart vir die volk. Tog moet hy aanvaar dat mense soms ander paaie kies, selfs al is dit teen God se wil. God se woorde bring vir Samuel perspektief en vertroosting in sy seer.

Moenie alles altyd as persoonlike aanvalle ervaar nie - soms is dit 'n grief teen die God wat jy met jou hele hart aanbid. Beur net voort met die goeie werk wat jy in diens van ons Meester doen!

Dr. Chris Marx

4HIMcrucified-Centre